Monday, June 3, 2013

മഴയമൃതം




മഴയമൃതം

മഴമുകിൽ മാനത്തു കരിവാരിത്തേയ്ക്കുമ്പോൾ
മയിലുകൾ ആടുന്നു പീലി നീർത്തി
മണിക്കുഴലൂതി പറന്നു നടക്കുന്ന
മായക്കാറ്റിന്നുമൊരുത്സവമായി

മദ്ദളം ചെണ്ടയിടയ്ക്ക പെരുമ്പറ
മാനത്തു താളത്തിൽ മേളമിട്ടു
മാലോകർക്കൊക്കെയും മാളമണയുവാൻ
മാനത്തു മിന്നൽ തിരിവെളിച്ചം

മരതകപ്പച്ച മലർക്കാവടി പോൽ
മരങ്ങളും താളത്തിൽ തുള്ളി നിന്നു
മേളം മുറുകീട്ടും മാറ്റങ്ങളില്ലാതെ
മാമലകൾ നെഞ്ചു വിരിച്ചു നിന്നു

മണ്ണിൻ മണവും മലരിൻ കുളിർമയും
മണിമുറ്റത്തെത്തുമ്പോൾ മനം കുളിരും
മണിമുത്തു വാരിയെറിഞ്ഞു തുടങ്ങിയാ-
മാരിയും മഞ്ജീരം കിലുക്കി തുള്ളി

മീനവും മേടവും പൊള്ളിച്ച പാടുകൾ
മായാതെ മേനിയിൽ നിന്നെങ്കിലും
മാനത്തുന്നെത്തിയ തേൻ കണം തീർത്ത
മറവിക്കയത്തിൽ അമർന്നു പോയി

മലയാള നാട്ടിലൊഴുകുന്നൊരീയമൃതം
മാരിവിൽപോലെ മറഞ്ഞുപോകാം
മടിത്തട്ടു കാട്ടി കിടക്കും പുഴകളെ
മരണത്തിലേ,ക്കിനിയുമയച്ചിടല്ലേ...

- കലാവല്ലഭൻ

.....................................................